ءبىلىم جانە عىلىم مينيسترلىگىنە قاراستى الماتىداعى ورتالىق عىلىمي كىتاپحانا قىزمەتكەرلەرى كورمەگە ءماشھۇر ءجۇسىپتىڭ 29 كونە قولجازباسىن اكەلىپتى. كورمەگە كىتاپحانا قورىندا ساقتالعان ءماشھۇر ءجۇسىپتىڭ قولجازبالارى, ەسكى كىتاپتارى جانە قازاق زيالىلارىنىڭ جازعان حاتتارىنىڭ تۇپنۇسقالارى قويىلدى. ورتالىق عىلىمي كىتاپحانا مەڭگەرۋشىسى قارلىعاش قايماقباەۆانىڭ ايتۋىنشا, 29 قۇجاتتىڭ 25-ءى - قولجازبا بولسا, قالعاندارى «سارىارقانىڭ كىمدىكى ەكەندىگى», «تىرلىكتە كوپ جاساعاندىقتان كورگەن ءبىر تاماشامىز» جانە ەكى «حال-احۋال» كىتاپتارى. بۇل كىتاپتار عىلىمي كىتاپحانا قورىندا 1950 جىلداردان بەرى ساقتالۋدا.
باياناۋىلدىق عۇلاما ءماشھۇر ءجۇسىپ (1858-1931) – اقىن, فيلوسوف, جىلناماشى, ەتنوگراف, تاريحشى, شەجىرە مەن حالىق اۋىز ادەبيەتىن جيناۋشى بەلگىلى اعارتۋشى. تاشكەنت, بۇقارا مەن تۇركىستانعا بارىپ, شىعىستىڭ عالىمدارى مەن ويشىلدارىنىڭ مادەنيەتىن, شىعارمالارىن زەرتتەيدى. اراب, پارسى, ورىس تىلدەرىن مەڭگەرەدى. ولەڭدەرى, ماقالالارى 1888 جىلى «دالا ءۋالاياتى» گازەتىندە جاريالانادى. 1907 جىلى قازاندا «سارىارقانىڭ كىمدىكى ەكەندىگى», «ومىرلىك تاجىريبە», «حال-احۋال» تۋىندىلارى جارىق كورەدى. 1905 جىلى پاتشالىق مانيفەستى سىناعانى ءۇشىن قۋدالانادى. شىعىس ماقامىندا جازىلعان «عيبراتناما», «گۇلشات-شەريزات», «بايانناما» داستاندارى, «كوشپەلى بولعان جۇرتتىڭ شارۋاسى», «اناما حات» ولەڭدەرى بار. ەل اۋزىنان بۇقار جىراۋ, شورتانباي, شوجە شىعارمالارى مەن اباي, سۇلتانماحمۇت تورايعىروۆ ولەڭدەرىن جازىپ العان.
سونىمەن بىرگە, باياناۋىلدىڭ ەسكەلدىدەگى مەموريالدىق مۋزەيىنەن اكەلىنگەن ءماشھۇر اتامىزدىڭ جەكە زاتتارى-قۇران, مۇستەك قوبديشاسىن, جەز لەگەن, كىسە بەلبەۋ, ءاميانىن, شاقشالارىن, كوزىلدىرىگىن دە كورمەدەن كورەسىز.
ەلىمىزدىڭ «قازاقستاننىڭ قاسيەتتى رۋحاني قۇندىلىقتارى» باعدارلاماسى بويىنشا ازىرلەنگەن جوباعا ءبىزدىڭ وبلىستان 78 كيەلى ورىن قوسىلدى. جوباداعى رۋحاني ورىننىڭ ءبىرى-باياناۋىلداعى ءماشھۇر ءجۇسىپ كەسەنەسى. كەسەنە جاڭاجول اۋىلى ماڭىنداعى ەسكەلدى بيىگىندە ورنالاسقان.
وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ارداق رايىمبەكوۆتىڭ ايتۋىنشا, عۇلامانىڭ مەرەيتويىنا ارنالعان رۋحاني مادەني شارالار الداعى تامىز ايىندا رەسپۋبليكالىق عىلىمي-پراكتيكالىق كونفەرەنتسيامەن جالعاسسا, باياناۋىلدا ايتىس, ءماشھۇرتانۋ وقۋلارى وتكىزىلەدى.
فاريدا بىقاي
«ەگەمەن قازاقستان»
پاۆلودار
سۋرەتتى تۇسىرگەن ءاليا ساماتوۆا
